La Usc di Ladins

A Muonio (Finlandia) l é stat l prum apuntament de la sajon per l paslonch en preparazion de la Copa del Mond perveduda a la fin de november a Ruka.

Ben segur ence nesc atlec ‘azzurri’ à tout pèrt e l é jà tacà a ruèr de bela neves al feminin per la Tèlia.

Te la doi garejèdes a tecnica classica la atleta fascèna da Moena Caterina Ganz la é stata protagonista de doi bela prestazions: n bon quinto post te la sprint de en vender ai 10 de november e soraldut n ezelent terzo post te la 10 km de en sabeda ai 11, prum test ofizièl de la sajon distance.  

N podie de gran valuta conscidrà che al via l era desvaliva protagonistes del paslonch de eles e Ganz la é ruèda demò a 42”4 da la venjidora Katharina Hennig, una de la più fortes atletes de Copa del Mond, che à dominà la scena e l’à vent con n vantaje de 41”3 su la conazionèla Laura Gimmler, autora del secondo temp de giornèda.

Tedò a chesta doi forta atletes donca troon la finanziera fascèna che con sie resultat à moscià de aer na condizion fisica de gran livel e de voler tor dant la neva sajon da d’invern con la dreta determinazion.

De più su La Usc stampèda de en vender ai 17 de november del 2023  (CRI.M)