La Usc di Ladins

Do la burta capotada che le Mareo s’á ciafé cuntra le Gherdëina, tocâra al 1. de dezëmber da afronté te ciasa le Ahrntal II, che é ti pröms posć de classifica. Al ê l’ultima partida de chësc altonn. Na partida ria, mo che le Mareo orô impó anuzé por ciaré da se refá. Ince sce la devënta n’é nia garatada – ara é jüda fora 3,5 a 4,5 – pón impó dí che le Mareo á fat bela parüda, pordon ala fin davëi ma por püc chidli, ci che ti lascia ince na saú antia. Tl confrunt diret ára n iade metü man cun mez n punt por pert, olache i dui chidladus sön pista á arjunt avisa le medemo numer de chidli, dedô él indere le Mareo che á albü la miú meton a saul ciamó trëi punc, insciö che ara stê 3,5 a 2,5 por i ladins. Le total di chidli ê dezisif. Iló é i aversars stá bugn da trá fora n vantaje megher de ma 7 chidli, ci che á indere basté por la devënta. Le Mareo á rosedé 2.965 lëgns cun la mesaria de 494,17, le Ahrntal é rové sön 2.972 cun la mesaria de 495,33. Le miú dla serada é sté l’aversar Eduard Hofer cun 548 chidli. Le rode d’altonn é sëgn rové, por le Mareo al 8. y cuartultimo post cun 7 punc.  (pablo)