La Usc di Ladins

Dai 25 ai 29 de juni iel stat na gran festa dl sport tl cuer dla Dolomites: la “La Sportiva Lavaredo Ultra Traila UTMB", na garejeda da sauté da mont su, via n Ampëz. Pra la garejeda di 50 chilometri, che ie stata ai 27 de juni, cun n deslivel de 2600 D+, à venciù Francesco Puppi cun n tëmp de 4:02.31, al segondo plazamënt udons Luca Del Pero cun 4:09.24 y al terzo plazamënt nosc atlet Alex Oberbacher, che à finà si garejeda te 4:14.31.
Pra la garejeda di 10 chilometri, chëla plu curta, che ie stata ai 25 de juni, cun n deslivel de 300 D+, à venciù l atlet de Urtijëi Samuel Demetz cun n tëmp finel de 39:01.

Na segonda garejeda per i atlec di Gherdëina Runners ie stata n dumënia ai 29 de juni a Bolzano Bellunese, nia dalonc da Belun: la nona edizion de La Velenosa, garejeda de sauté da mont su sot al Monte Terne cun na lunghëza de 14 chilometri. L gran ciaut ne n'à nia sciautrì i passa 1.000 cuncurënc che à fat pea pra chësta garejeda tl Veneto. N ie muec dala 10 danmesdì y bele dal scumenciamënt ie nosta atleta Martina Cumerlato pieda danora y la ne n'ie nia plu stata da bater. La à venciù la garejeda cun n tëmp de 1:25.07.

Per i Gherdëina Runners, Manuela Perathoner

L articul sarà da liejer tla edizion nueva de La Usc de n vënderdi ai 4 de lugio.