La Usc di Ladins

En sabeda passada dales 8 da doman ésera stada tan inant. Tl zënter d’Al Plan él gnü stlopeté le bot dl start por la "Kronplatz King MTB Marathon", gara de roda da munt cun start tl zënter marô y travert sön Plan de Corones. Cun temperatöres incër i 7 gra de cialt y n cil grisc da ciarü – mo por fortüna zënza plöia – s’á atletes y atlec metü sön tru por arjune le travert dan la ciampana "Concordia". I pröms da pié ia é stá chi dla "King Marathon", la varianta plü lungia cun 64 km de percurs y n deslivel de 3.150 metri. Mesora dedô i ára toché a chi dla "Prince" cun 49 km y 2.160 metri de deslivel. Por intrames les categories na bela sfachinada, a chëra che al á tut pert sides atlec de prestisc fora dal "Hero UCI MTB Marathon World Cup", sciöche ince na dërta partida de ziclisć amatoriai dl post.
Pro i ëi á davagné indô Leonardo Paez dala Colombia, bele davagnadú dles ultimes trëi ediziuns, pro les ëres á davagná la taliana Claudia Peretti.

Deplü sön i resultac, ince di tröc marôi che á tut pert, podëise lí t’La Usc di Ladins di 5 de setëmber  (pablo)