La Usc di Ladins

L ie na ustaria per chëi da tlo, ulache n se anconta per s’la ciaculé, ulache truepa umans vën cun si mutons y ulache l vën mo jit a carté. Ma nia mé. L Café Surëdl a Urtijëi ie na strutura ulache persones cun dejabiltà o deficulteies mpera a lauré y giapa crëta te sé nstësc. L fin? Pudëi zapé ite tl mond dl lëur y se tò nstësc tla mans si vita. 

L Café Surëdl à festejà n juebia dl’ena passeda si 25 ani cun na pitla festa y la giaurida de na mostra de fotografies. Per chësc pruiet fotografich iel unì fat de ndut 14 fotografies de persones che lëura o à laurà tl Café Surëdl. N i vëija te situazions de lëur desfrëntes, te vel’ butëiga, ustaria o hotel. L ie n pruiet che n à metù a jì n cunlaurazion cun l Fotoclub Gherdëina y l Istitut Ladin Micurá de Rü.

Ntan la prejentazion y la festa de aniverser àn abù paroles de lauda y rengraziamënt per duc chëi che à judà pea te chisc ani tl Café Surëdl.

Elisabeth Kostner

L articul tla edizion atuela de La Usc di Ladins.