La Usc di Ladins

Bon ejit per la quarta edizion del Vertical Bufaure metù a jir en domenia passèda ai 21 de setember te l’ultima giornèda de bon ciaut e soreie del istà 2025. En dut 80 i scric ite a la garejèda, anter omegn e femenes, gregn e picoi: no pec conscidran che la medema dì l é stat autra doi garejèdes de nonzech tel medemo format a Sèn Martin tel Primier e tel Alpago (BL).

Dal pont de veduda tecnich, gran resultat cronometrich per l venjidor Lorenzo Milesi clasc 2006, Fiamme Gialle, campion del mond U20 de skialp, che te 31’45’’ l é ruà al travert te la piana de Bufaure, do aer coret 3 km e rampinà 750 m de dislivel. Anter eles la venta la ge é jita a Vanessa Marca del 2006, Fiamme Gialle, che à fermà l cronometer sul temp de 41’13’’. Do da ela sul podie la runners Giulia Pojer (45’06’’) del grop Stella Alpina Carano e Valentina Ghetta da Vich (46’18’’) de Bela Ladinia.
Ogne an l Vertical endrezà da la Coprativa sozièla Inout vel esser ence moment de comunanza e de festa per serèr su con legreza la sajon da d’istà sa mont. Do la garejèda al Refuge Bufaure apede ai atlec se à fermà n grum de jent per la marena e per l conzert del grop de »i Maestres de schi«, la tribute band del Chum, che à portà dant toc feruscoi e fat damat dessema a so publich. Sun Bufaure l era ence la Sociazion Bambi, con jeghes e golosaries e semper n pensier out a chi che à più debesegn.
Doman, sabeda ai 27 de setember a Soraga l é la Cioch - La Palua, l tradizionèl vertical endrezà da la sozietà sportiva 3Esse Soraga, con travert alternatif respet al Bait del Vedeler a cajon de lurieres tel bosch. Info e enscinuazion su www.3essesoraga.it

Se pel lejer dut su La Usc nr 37 dai 26 de setember, che se pel troèr ence te la boteighes de sfoes. Sul sit www.lausc.it se pel fèr l abonament al e-paper per aer azes vigni vender a dut l sfoi sul fonin, tablet o computer.


 (Thomas Zulian)