La Usc di Ladins

En sabeda ai 27 de setember la sociazion sportiva 3Esse Soraga à endrezà la terza tapa del Vertical FFB, Fiem, Fascia, Biois, de corsa sa mont. L era la Cioch – La Palua, che dal ciamp de balon de Soraga à menà i concorenc fin sa La Palua, 2,9 chilometres e n dislivel de 340 metres. Chest l é n percors nef per chesta tapa del Vertical ajache chest an, per via de la piantes amò via per jabas, l comitat de endrez de la 3Esse col president Ettore Rossi, à cognù n meter dant un alternatif al travert tradizionèl del Vedeler, da l’autra pèrt de paisc. A la partenza l era na carantina de atlec che é ponté via con gran gaissa per jir dal ciamp de balon envers l Sester e su fin sa La Palua.

L prum a ruèr al travert l é stat Andrea Lusuardi de Trentino Running Team clasc 2000, col temp de 18’54’’ sobito tedò Thomas Guadagnini de la US Dolomitica col temp de 19’09’’ e terzo l joen Martin Chiocchetti de la Monti Pallidi te 19’11’’.
Anter eles la venjidora assoluta l é stat Giulia Pojer te 24’16’’, tedò l é ruà Michela Rizzi de Bela Ladinia col temp de 25’27’’ (pruma de la categoria over 50) e terza Lorenza Trentin di Piazaroi te 25’34’’ (2^ di over 50).

La premiazions é states fates te La Gran Ciasa con la partezipazion del speaker Mattia Valentini che ge stèsc do a duta la garejèdes del Vertical. Chesta tapa segna mingol la outa per l zircuit ajache mencia amò trei garejèdes: en sabeda ai 11 de otober l é la Vertical King of Caorina a Belamont, ai 19 de otober l é la Scaldagambe e ai 25 la Costolina. Venc l premie Finisher chi che tol pèrt amancol a cater proes.

Dut l articol te la edizion neva de La Usc de vender ai 3 de otober  (MCI)