La Usc di Ladins

Dl prim cialòvela ora scialdi bën per l Gherdëina n juebia sëira dl'ena passeda: do mé 24 secunc festejòven tl Pranives bele l prim gol contra l Asiago de Simon Pitschieler. La ie jita inant cun l Hc Gherdëina che drucova y che ie stat bon tl 12ejim menut de fé l 2 a 0 cun Hannes Kasslatter. Ma canche l semiova che l Gherdëina ebe tla man l juech, se à la storia raidà y l Asiago ie stat bon de valivé ora fajan doi goi. N ie jic ti tëmps suplementeres, te chëi che chëi de Gherdëina à mo abù na bona ucajion per vëncer, ma la ne n'à nia ulù vester. Ai penalties à l Gherdëina perdù y nscila àn, nce sce n à trat plu iedesc sun porta che no l Asiago, mé davanià un n pont per la tlassifica dla Alps.

Nia da nfé contra l Jesenice
Nce n dumënia tla Slovenia à l Gherdëina messù ti la zeder al Jesenice. Per l prim iede te chësta sajon à l alenadëur Teppo Kivelä pudù se n jué dl pech fascian Sebastiano Soracreppa. Ël se ova fat mel y ne n'ova mo mei pudù jughé per l Gherdëina. Nce Samuel Moroder fova inò te scuadra, l manciova donca mé plu Luke Moncada. Mpo ne ti àla ai nosc nia drë' butà y ala fin ài perdù per 5 a 1.

L Gherdëina ie śën cuinto te tlassifica. La va de se refé y dantaldut de tuché deplù, speron bele tl proscim juech chësta sada ai 25 de utober dala 18:30 te Sëlva contra l Maran.

EK

L articul sarà da liejer tla edizion nueva de La Usc de duman vënderdi ai 24 de utober.