La Usc di Ladins

L é temp de mudamenc per la parochies. Do l salut a don Andrea en domenia ai 5 de otober a Sèn Jan, ai 12 l é stat festa forin Fiem per ge dèr l benvegnù a don Devis Bamhakl, chiamà a tor l post de don Giorgio Broilo e rejer la trei parochies de Pardac, Juan e Pancià.
Don Devis Bamhakl l é da Moena, l é stat ordenà preve del 2020 canche l aea 48 egn aldò de na vocazion ruèda te na età jà madura che, do aer lurà n muie de egn te la Polizia de Stat, l à cernù de mudèr sia vita. Te chisc ultimes egn l se à fat cognoscer ence te Fascia, olache l à ensegnà te scola, per sie bel carater algegher, ironich e paruscent, che segur l lo deida a se fèr ite co la jent e a se fèr benvoler.
En domenia n muion de jent se à binà a Pardac per l compagnèr te chesta sia pruma esperienza de rejer la parochies: jent dai trei paijes de Fiem, ma ence tropes da Moena e da Fascia. L era i preves de Moena don Gianni Damolin, don Bruno Daprà e ben segur no podea mencèr don Enrico Conci.
L’aministrazion de Moena ge à sport a don Devis i augures de »n percors rich de fruc spirituai e encontres sinzieres e che so servije sie testimonianza viva de fe e speranza«. Ence nos se jonton ite a chest augurie e ge l sporjon ence a don Mario Bravin, ajache en domenia ai 19 de otober da les 14:00 te gejia de Poza don Albino metarà te sia mans la parochies de Mazin, Pera, Poza, Vich e Soraga.

Se pel lejer dut su La Usc nr 40 dai 17 de otober, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.



 (Lucia Gross)