La Usc di Ladins

Coscita del 2022 i à tolesc via i pontes de ‘l cantier e i s’in é śude. Pi de ‘na ota ra sozietà de medejina Gvm r’à dito che se podea scomenzà danoo, che i arae ciatà outre lourantes, ‘na dita noa, ma par ades no s’à vedù nuia. Anche chesto de ‘l ospedal ‘lé un de chi laore che i aea da fei ignante del 2021, par i Canpionate del mondo de schie, ma i no n’é śude adora. Chesto no n’é un laoro de el Comun de Anpezo, gouja che ra sanità r’é de ra Rejon Veneto, ma isteso el capocomun anpezan ‘l à da stà de sguaita: ignante ‘l à fato Gianpietro Ghedina Crepo, ades Gianluca Lorenzi Chenopo. In Anpezo s’à acaro de vede un ospedal che laora polito, par dià ra śente de ‘l paes, ignante de duto, e ‘pò anche i foreste, ci che vien a spaso, pichesee d’inverno, canche i toma coi schie e i se fesc mal, ma anche d’istade. Ades se spera che ste benedete laore i pode fenì almanco i doi anes che vien, da ese pronte par ra Olimpiades e Paralimpiades d’inverno, de febraro e de marzo 2026. Sarae ormai algo. (MDM)

De plu tla edizion stampeda de La Usc di Ladins o sun l e-paper a paiament www.lausc.it/e-paper