La Usc di Ladins

Va inant ence del 2020 l percors de inovazion educativa sul teritorie del Comun general de Fascia con l projet #Fuoricentro che del 2019 à abù gran partezipazion.

Via per l meis de jené e amò ti meisc che vegn vegnarà portà dant vèlch apuntament per l projet »Families educantes«che enten meter dant soluzions e strumenc concrec per responer ai besegnes de la comunitèdes de persones. Travers la profescionalitèdes di operatores l projet #iosonofuoricentro se met dant desche n soget teritorièl che é bon de cognoscer e analisèr i mudamenc che vegn dò cà e de chierir belapontin de i ressolver ensema a la comunità. Vegn tout dant i argomenc de housing sozièl, welfare teritorièl e generatif, urban planning e svilup turistich.

L prum apuntament é out ai genitores, en mercol ai 15 de jené te sala grana del Comun general de Fascia da les 17.30 a les 19.30 con la scontrèda »È tempo di bilanci«.

Te la pruma pèrt de l’enconter vegnarà proponet na lingia de strumenc, de papier e web (app, siti) che vida la families a meter jù la entrèdes e la sortides che se à via per l’an, te n meis o te na setemèna. Te la seconda pèrt vegnarà analisà ensema strumenc, vides de se comportèr e pìcoi mudaments che se pel tor sù ogne dì per sparagnèr i cosćde la vita. 

L secont apuntament del meis de jené sarà en mercol ai 22 da les 17.30 a les 19.30 te Sorastanza de la Scola Ladina de Fascia, l’é out semper ai gregn e chest’outa se rejonarà de digitèl.

La families e i genitores no é semper ajorné su la ultima novitèdes tecnlogiches per chel che vèrda social network e internet, a desferenza di fies, o se i se n capesc fora, i sotvalutea l besegn de formèr i joegn e i bec a na doura giusta de chisc strumenc, percheche i sie bogn de schivèr i risesc. Se trata donca de n laboratorie pratich per cognoscer miec l web e i social e per didèr genitores e joegn a se orientèr te n mond olache la tecnologìa vegn veduda e tratèda desche oportunità no demò desche element de pericol. 

Via per i meisc che vegn vegnarà endrezà ence laboratories sul rezicle de la plastica, su la creazion de shampoo dur e no lujech e su la poejìa. Donca tegnive ajorné, podede ence jir su la piata Facebook FuoriCentro: coltiviamo le periferie.


 (mci)