Matteo Ploner tel Consei de l’Istitut Cultural Ladin

Data

24 de jugn 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Dozent de economia a l’Università de Trent, l’era jà stat tel CdA de l’ICL dal 2014 al 2019 e l’é stat nominà da dut l Consei general a una.
En mèrtesc sera ai 23 de jugn l Consei general se à binà en videoconferenza chiamà ite con prozedura de prescia per nominèr l raprejentant de la mendranza tel Consei de Aministrazion de l’Istitut Cultural Ladin Majon di Fascegn.

Cesare Bernard a inom del grop de mendranza UAL à recordà che la nomina é domanèda per serèr su na locia che se aea avert acà dotrei meisc, canche l raprejentant de la mendranza del Comun general Andrea Rizzi aea dat la demiscions, ensema con cheles de la componenta de la Comiscion Culturala Lodovica Dioli desche raprejentanta tel CdA.

Bernard se à dit endespiajù de aer cognù renunzièr al contribut che Rizzi aea portà inant con competenza e l’à dit che da chel moment de contrast duc à perdù vèlch e l’é da se fèr na riflescion sun chest. L’à dit che l’é de besegn de jent con idees, competenzes e vijion e aldò de chest l’à portà dant la proponeta de nominèr Matteo Ploner, che l’à n curriculum de gran prestije.

Ploner, de naa da Dèlba e enciasà a Trent, l’é professor sozià te la facoltà de economìa de l’Università de Trent e l’era jà stat tel CdA de l’Istitut te la legislatura passèda, dal 2014 al 2019, con nomina regionèla che no era stata ampò confermèda de mé del 2019.

Bernard se à augurà che Ploner aesse l met de portèr dant so contribut ascort e percacent te chest moment de la vita de l’istitut e che ence la Comiscion Culturala vegne scutèda e touta en conscidrazion.

Ence l portaousc de l’auter grop de mendranza, Maurizio Deville, à sostegnù chesta candidatura conscidrèda segur positiva per l’Istitut e dapò dut l Consei à lità a una.

Augures de bon lurier ge é stac palesé al nef component del CdA Matteo Ploner da man de la procuradora Elena Testor, del president del Consei general Francesco Pitscheider e de la conseiera de procura e presidenta de l’Istitut Ladin Lara Battisti, che se à ampò lamentà che Bernard aesse volù portèr te Consei general la costions de l’Istitut, che cognessa restèr fora da intromiscions politiches.

Bernard à rebadì che sie intervent era stat deldut chiet e che el no à cusà nesciugn, ma ajache se trata de nomines fates dal Consei general, te chest organism se pel n rejonèr.  

Ence l conseier provinzièl e regionèl Luca Guglielmi à portà dant si augures de bon lurier a Ploner, recordan che i é stac ence ensema tel CdA e l se à dit spervajo che l posse dassen dèr n contribut positif per l’Istitut Cultural Ladin.  (LG)