La Usc di Ladins

En mertesc dl’edema passada ai 13 de ma s’á la Junta Provinziala de Südtirol dé jö cun n proiet dla sozieté di lifc da Bornech "Kronplatz Seilbahn GmbH", che ó renové l’implant "Kronplatz 1+2" da Raiscia cina sön Plan de Corones. Chësc lift á oramai arjunt 20 agn de vita y al ti spetass na gran revijiun, che á sambëgn i cosć aladô. La sozieté á indere tut la dezijiun da le baraté fora. L’implant cun cabines da 8 posć dess deventé n implant modern cun cabines da 10. 
Cun le proiet á la sozieté pustra indere ince damané da podëi sposté la staziun amez, y realisé lapró na varianta nöia por i schiadus. Les pistes che condüj da Plan de Corones jö Raiscia, la "Sylvester" y la "Herrnegg", é intrames pistes fosces y porchël nia adatades por vigni schiadú. La varianta nöia coliass la pert dessura dla Sylvester cëch jö cun la staziun amez y spo jö inant cina ala pert dessot dla Herrnegg, realisan insciö na pista cöcena y porchël plü saurida. Investimënt complessif: 35 miliuns de euro.
Bele damperfora â la consulta ambientala dla Provinzia dé jö n arat negatif al proiet, spligan che i intervënc ê massa gragn dal punt d’odüda dla contrada y ecologich. La Junta Provinziala á dit de sce al implant nü y a na pert dla varianta; na pert é gnüda refodada, mo les organisaziuns ambientalistes se tëm che al sides ma na "manovra" por aprové le rest te n secundo momënt. 

Deplü podëise lí t’La Usc di Ladins di 23 de ma  (pablo)