Litazions aministratives, confermà la dates

Data

15 de messel 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ai 20 e 21 de setember se jirà a litèr per i Comuns, l Comun general de Fascia e per l referendum per l tai di parlamentères
L’é ofizial, la litazions de Comun, che aessa cognù vegnir fates ai 3 de mé e che é states sperlongèdes per via de l’emergenza Covid-19, les sarà ai 20 e 21 de setember. En lunesc ai 13 de messèl l president de la Region Arno Kompatscher, a una col president de la Provinzia de Trent Maurizio Fugatti, à sotescrit l decret.
La litazions tolarà ite passa 158 comuns del Trentin e 113 del Sudtirol e les sarà n test litèl emportant per la gran zitèdes desche Trent, Roveredo, Riva e Cles, ma ence per noscia valèdes. Te Fascia se litarà no demò per i 6 Comuns ma ence per l renovament del Consei del Comun general de Fascia. Amò apede chesta data é stata cernuda percheche te chi dis se jirà a litèr ence per l referendum costituzionèl sul tai di parlamentères.
Se trata de na sort de election day donca, ajache l’é stat metù ensema aministratives e parlamentères. Chest per limitèr i risesc sanitères con i adempimenc de sanificazion e netijia e ence per tegnir serèdes la scoles manco dis che l’é meso. Se spetèa da temp conferma de la dates dò l sperlongiament dezidù chesta aisciuda. Taca ite ades n istà empegnatif per i movimenc e i partic politics ajache la candidatures a ombolt e procurador e la listes per i desvalives conseies cognarà vegnir depojitèdes per i 10 de aost.
Te Fascia chesta aisciuda se aea tacà a sentir oujes de candidac e listes ma dapò dut se à ferà. Ades i doi movimenc politics de Neva Ual e Sociazion Fassa, che se troarà de contra per la litazions del Comun general, arà temp presciapech n meis per meter jù sia listes de candidac e medemo ence chi che volarà se meter a la leta per l’encèria de ombolt e de conseieres per i 6 Comuns de Fascia.
Na corsa contra l temp donca per dezider programes e candidac che jirà a rejer i enc aministratives de noscia val.

De più su La Usc 28 de vegnarà fora chest vender ai 17 de messèl  (Monica Cigolla)