La Usc di Ladins

Per vèlch persona fèr volontariat l’é na vocazion, per etres l’é na vida per didèr fajan vèlch de utol per la comunanza. Doventèr volontadif de la Crousc Checena vel dir meter a la leta temp e energìes a servije di etres, zenza pertener nia de retorn. Vel dir se meter a la proa e durèr la competenzes per miorèr la condizions de vita de la persones più deboles, l’é istesc chi che l’é. Fèr l volontadif de la Crousc Checena vel dir se tor sù na encèria emportanta tel mond del volontariat ma ge vel esser enjigné percheche l temp e la competenzes metudes a la leta sie percacentes. Per chesta rejon inant che doventèr n volontadif de la Crousc Checena ge vel fèr n cors de formazion a na vida da esser enjigné per poder esser de aiut endèna n intervent de socors.
La Crousc Checena l’à semper de besegn de volontadives, ge vel corir duta la ores te na dì e più se é e miec pel vegnir spartì fora l lurier. Chest se l’à vedù amò de più te chisc ultimes meisc, endèna la pandemìa da Covid.
Per chesta rejon la Crousc Checena de Fascia à metù a jir n cors per aspiranc volontadives. L temp per se scriver ite é jit fora ai 22 de setember, ma chi che volessa se meter dant i pel amò l fèr. Ge vel aer 14 egn compii e n gran estro de se meter en jech. »L mond de la Crousc Checena – disc l president Francesco Sommavilla - l’é n muie de più che l scempie servije de emergenza-urgenza te ambulanza.«
I enteressé i pel scriver na mail a amministrazione@crifassa.com, telefonèr al numer 0462 764031 o domanèr informazions ence su Whatsapp al numer 349 2233491.  (Monica Cigolla)