La Usc di Ladins

La Presidenta de la Comiscion de zertament de la cognoscenza del lengaz e de la cultura ladina Sabrina Rasom, aldò de l’art. 18 de la L.P. 6/2008 e de la deliberazion de la Jonta provinzièla nr 543 dai 23 de mèrz del 2012 fèsc a saer che l’é stat fissà la dates per la proes de ejam de zertament del lengaz e de la cultura ladina.
La proa scrita de livel C1, B2 e B1 sarà ai 21 de otober del 2020 da mesa les trei domesdì te senta de la scola populèra de Vich te piaz J.B. Massar 14.
L medemo dì, donca en mercol ai 21 de otober, da la medema ora sarà ence la sescion resservèda a la scola de livel C1, B2 e B1.
Ai candidac ge vegn domanà de se prejentèr a l’ejam con n document de recognosciment valévol.
Per la proa de ejam de livel C1 vegn conzedù cater ores de temp, vegn recordà che se pel durèr l dizionèr. Per la proa de ejam de livel B2 e B1 vegn conzedù trei ores de temp, no se pel durèr l dizionèr.
La dates e l’orarie de la proes a ousc (a cheles che vegnarà ametù demò i candidac che arjonjarà i 7/10 te la proa scrita) vegnarà fac a saer en ocajion de la proa scrita.
La presidenta de la Comiscion fèsc a saer che l’é stat fissà ence la data de l’ejam de zertament del lengaz e de la cultura ladina de livel A2 con la proa a ousc che sarà en jebia ai 5 de november te senta del Comun general de Fascia, te strada di Pré de Gejia 2 a Sèn Jan. I oraries vegnarà metui fora sul sit de l’ent ai 27 de otober del 2020.
Tel respet di protocoi Covid 19 chi che tol pèrt a l’ejam i cognarà se mesurèr la fiora dant de tor pèrt a l’ejam, se la é maora che 37,5° i cogn restèr a cèsa e meter en esser chel che l’é pervedù dal protocol anti-empestament. Pel tor pèrt a l’ejam chi che à la mèscra de protezion chirurgica e co la autodeclarazion en cont de bona sanità che vegnarà enjignà da la comiscion per la dì de l’ejam.
Per maor informazions se pel se oujer al Comun general de Fascia, telefon 0462 764500, mail cultura@comungeneraldefascia.tn.it.