La Usc di Ladins

Na fona sensibilità l’é chela che vegn al luster tolan te man i scric di diaries lascé da Virgilio Soraperra de la Zoch. Desvaliva piates de chisc codejìe smarii dal temp embombides da la schertura fora de anter de l’artist fèsc bela parbuda sul liber prejentà te chino Marmolèda de Cianacei en sabeda ai 17 de otober da les cinch domesdì. La familia Soraperra con l didament del filantrop Gianfranco Traverso à volù meter per scrit l’èrt de l’artist e la scomenzadiva l’à abù dassen n gran suzess.
L giornalist Silvano Ploner, che à moderà la prejentazion, dò aer saludà la autoritèdes, l’à dat n gran benvegnù a Zoran Lupinc, sonador sloven de òrghen da mantech. Anter duc i enteresc de Soraperra, fegurèa ence la musega: ti egn l’aea apontin fat desvaliva trascrizion de toc de musega popolèra di egn Trenta, Caranta e Cincanta. 
L’ejibizion de Lupinc la é stata enterzèda con la letura da man de Loreta Florian di pensieres sensiboi e sinzieres envers la vita che Virgilio scrivea te sie papieres. Florian à let de la storia de la majon de familia, ma ence de vera, de bombardamenc e de padimenc. De fadìes e struscies, ma ence de na forta religion, la vita de enlouta. Someèa che sun paladina fosse Virgilio a scutèr canche se à scomenzà a rejonèr de sia pascion per l’èrt, de coche l se sentìa l’om più content al mond canche per la pruma outa sun Pian de Schiavaneis l’à fat sie prum murale. No l’é mencià paroles più fones en cont al segnificat, al sens e a l’emportanza de la vita.

De più su La Usc 42 di 23 de otober  (Nicoletta Riz)