La Usc di Ladins

Apede al trofeo per la Copa del Mond, ideà da Lorenza Cloch, la Scola Ladina de Fascia à abù l met de meter a la leta l frut de sie lurier creatif e artistich ence per n auter event, la Copa Europa che ai 2 e 3 de mèrz chiamarà endò sul portoi La VolatA de Sèn Pelegrin la atletes miores del mond per doi garejèdes de SuperG che recuperea proes en program te la Sarntal. 

L Ski Team Fascia, con sie president Leonardo Bernard, dò aer vedù i bie lurieres realisé dai studenc de la Scola del teritorie l’à domanà de poder aer ence l trofeo per chest event e l’à cernù na opera che moscia na schiadora en posizion atletica e plastica che somea belapontin te chela de taèr l travert de sia garejèda, vegnir fora da n cerchie desche na medaa.

Ence chest’outa a realisèr chest projet l’é stat na tousa, na joena studenta de la 4^ clas che fèsc l percors LAF, donca feguratif, Irene Tabanelli.

Irene l’é na studenta del Ski College, n joen talent del schi alpin che te chest trofeo à donca podù raprejentèr se enstessa e sie ensomech de n davegnir lumenous tel schi agonistich.   (LG)