La Usc di Ladins

A la metà de marz Pare Alberto Dellagiacoma dal Malghèr, de 82 egn, l’é endò peà via envers l’Ecuador, olache l’à passà 50 egn de soa vita.

Nasciù ai 3 de jugn del 1939, diejem de 11 frades, P. Alberto l’é jit dò le pedie de 4 frades miscionaries: P. Vittorino, P. Carlo e P. Raffaele, jic duc trei te l’Africa e oramai da egn sun Paradis, e suor Gisella del 1927, che dò esser stata tel Sud America per passa 60 egn ades la é vegnuda de retorn, la stasc te n convent a Rosà e ogni tant la vegn te Fascia.

P. Alberto no l vedea l’ora de poder endò jir via, dò aer cognù star chiò per doi egn, rencurà da soa sor Rosetta, per rejon de sanità e per le limitazion de moviment emponude dal coronavirus.

»De messal del 2017 a Cuenca jie a dir messa e n bus e l me à ciapà ite – l me à contà – é fat na fratura esposta al pe, i me à operà ma no ere bon de l mever. Son vegnù en Italia e i me à fat n’autra operazion, ma col mal dal zucher l’é più lonch varir. Ades la ferida la é a post e cogne me usar via al moviment. Chiò stae ben, i me vel ben, ma no sé che far, stente a me far ite, me mencia dut l percors e l svilup che l’é stat te duc chisc egn. Aló posse didar, jir a troar i malé, dar la comunion, confessar, l’é n muie de gropes che me chiama, posse ge spiegar la Bibia e far catechesi. Chiò no é nience podù didar te parochia perché stentae a jir.«

Aon rejonà ence de n muie de autre robe, de soe esperienze e soraldut de coche l’é mudà la vida de esser miscionaries, perché l’era chest l messaje che l volea ne lasciar.

Dut chel che l me à dit l'é da poder su La Usc stampada de vender ai 2 de oril.

 (Lucia Gross)