La Usc di Ladins

Seré sù i campionac, serèda sù soraldut l’AHL olache la maor pèrt di atlec taliegn jia, l’hockey no se ferma. La Nazionèles à defat dat l via ai arcedamenc per enjignèr i apuntamets del davegnir, a scomenzèr dai Mondièi che sarà amò del 2021, con n eie ence jà a la Olimpiades del 2026. Anter la formazions che se à binà ensema ence chela talièna, tant con la squadra mascolina che con chela de eles.

La squadra di omegn, vidèda da coach Greg Ireland, bon mix de senadores e, soraldut, joegn da crescer, l’à jà scomenzà a jièr la pruma partides da peconc. Anter sabeda prum e domenia ai 2 de mé l’é jit en scena na dopia endesfida con la Franzia, con na pruma venta talièna per 1 a 0 e na desfata enveze, te la seconda endesfida, per 4 a 1. L calandèr de partides l jirà inant con l’endesfida a la Svizra di 4 (endèna che sion en stampa) e la doi partides con l’Austria di 8 e 9.

Te la formazion talièna ence jiadores ladins de naa o de squadra. Con la maia Azzurra defat i fascegn Michele Marchetti e Sebastiano Soracreppa e i gherdeneres Diego Kostner, Simon Pitschieler e Diego Glück, ma ence Gregorio Gios e Roland Hofer che i jia tel Fascia, Marco de Filippo, Phil Pietroniro e Enrico Larcher del Cortina.

Arcedamenc ence per la squadra de eles dò la paussa per l Covid: anter eles ence la gherdenera Elena Perathoner, clasc 2002 che jia ti Lakers Egna.

 (Daniele Verra)