La Usc di Ladins

Con l’event provinzièl de en vender ai 7 de mé se à serà sù la pruma pèrt del projet Green Jobs, n percors de arvejinament a l’imprenditorialità sostegnibola, che à tout ite 15 scoles trentines e sacotenc studenc sun dut l teritorie nazionèl.

L projet à abù desche prum obietif la creazion de na start-up per la realisazion de n prodot o de n servije green per l teritorie olache stèsc i studenc, con l svilup de idees imprenditorièles sostegniboles, che posse vegnir portèdes inant dai studenc.

Per la Scola Ladina de Fascia al Green Jobs 2021 à tout pèrt la clasc 3 LSA del Liceo scientifich che jà col meis de jené, col didament de esperc, à tacà a ideèr e concretisèr l projet DNA – Val de Fascia, na idea outa a la realisazion de n turism sportif sostegnibol sul teritorie.

De gra a la colaborazion con Dolomites Superski, che se à metù dant belapontin n projet da l’inom DNA – Dolomites, i studenc à metù jù n percors che ponta a ge fèr tor coscienza a la comunanzes che vif i teritories da mont de l’emportant ruol che l’à ogne sentadin te la costruzion de n turism sostegnibol dal pont de veduda ambientèl, economich e sozièl.

En jebia ai 13 de mé i studenc de la 3 LSA à prejentà sia idea imprenditorièla a na scontrèda nazionèla olache à tout pèrt duc i partezipanc del Green Jobs 2021 e ai 5 de jugn i é stac envié adertura al Festival de l’Economia de Trent, olache i portarà dant sie projet a n publich competent e enteressà.

De più sun chest projet su La Usc stampèda de en vender ai 14 de mé del 2021