Un di ponc de forza de chest event l’é stat semper la capazità de tor ite la sociazions de Poza, Pera e paìjes vejins, tegnan adum passa 200 volontadives, e chest ti egn à didà a leèr e fèr crescer la comunanza. Ampò fèr n struf de dotrei dis, enceben che tel pien de la sajon no sie sorì, l’é desferent che cogner pissèr, endrezèr, se cruzièr e se tor sù ogne responsabilità descheche cogn fèr i componenc del Comitat,
View the embedded image gallery online at:
https://www.lausc.it/valedes-ladines/fascia/16448-festa-ta-mont-lerga-ai-joegn#sigProIdcfc5ccac02
https://www.lausc.it/valedes-ladines/fascia/16448-festa-ta-mont-lerga-ai-joegn#sigProIdcfc5ccac02
Jai dotrei egn l Comitat organisador, vidà da Roberto Bertacco, l’à scomenzà a rejonèr del besegn de n mudament generazionèl, de jent neva che porte idees, gaissa e forza tel grop de endrez de chesta festa. Chest tant i l’à rebadì, Bertacco e l grop de amisc che jai egn aea abù chesta bela pissèda, en lunesc passà te sala de Comun de Sèn Jan, dedant ai raprejentanc de la sociazions che da egn colaborea e che, desche ti egn passé, é stac chiamé ite al scomenz de la sajon da d’istà per n moment de confront organisatif.
Chest’outa però la desponibilità de forza neves no l’é stat demò na speranza, ma na comunicazion: »l grop de joegn ades l’é, noi podon se tirar mingol da na man e ge far larga, ma seghitaron a ge star apede, amancol ti prumes tempes, e ve domanon a duc de sostegnir chest grop de joegn che se à metù a la leta: l’é na gran fortuna, ajache l’é semper più senester troar joegn che vegn dò«. Chest, en curt, l’é chel che à dit i componenc del veie Comitat, che dapò i ge à lascià la parola al grop de joegn (presciapech na dejina) che se à metù a la leta per se tor sù l’endrez de la Festa ta Mont, e che à rejonà travers la portaousc Melissa Locatin de Patron, nominèda neva presidenta. L’é stat ampò rejonà ence del besegn che zachei con più esperienza reste apede al nef grop di joegn, donca tel Comitat restarà ite ence vèlch component del grop fondator.
Su La Usc stampèda de vender ai 16 de messèl se pel lejer de più ence sul program de la festa che sarà en domenia prum de aost. (Lucia Gross)