La Usc di Ladins

L é ora del »Festival del Puzzone« a Moena. Dai 17 fin ai 19 de setember l é la zelebrazion del cognosciù e aprijià formai de la tradizion ladina da la saor forta ma gustegola, con la scomenzadiva che festeja chest an si 10 egn con na edizion più rica che zenza, se sa ben tel respet de la normes per l stravardament de la sanità. 

I pascioné del bon magnèr ma ence chi che ge sà bel fèr atività a l’averta tel meis de setember, podarà viver de bela e bona esperienzes de gra a chest formai che sarà protagonist de raides, degustazions, laboratories per bec, proponetes gastronomiches e aperitives.

Sul program en vender la vijita a la stala del agritur El Mas, per veder la laorazion del formai e l cercèr, domesdì l laboratorie sul smauz e do n aperitif a km 0. 

En sabeda na raida dal zenter de Moena con disnèr al Agritur El Mas, marena a Malga Roncac con entrategniment teatrèl e marendel golous de la Mèlga de Pardac e Moena e do degustazion sensorièla tel Bar Stella, laboratorie de Fabio Vettori ‘Le formiche casare’ e gara de moujer con la vaces didatiches.

La domenia raida con la roda eletrica te la frazions de Moena, scomenzadives te piaz e jech itinerant anter la strentes e i veies tobié de Moena.

De più su La Usc stampèda de vender ai 17 de setember.  (Cri.m)