La Usc di Ladins

L’era de setember del 2017 canche, con na bela zelebrazion piena de emozion, Poza tolea cumià da suor Natalia, che era ruada te val del 2013 ensema con suor Livia e suor Dorota, e la festejaa i 25 egn de profescion religiousa de suor Cirila, ruada del 2015. Enlouta la comunanza ge dajea l benvegnù a suor Beata, na pìcola monia feruscola e grignolenta che ruaa a portar inant l prezious lurier te la comunanza en sostituzion de suor Natalia.

Ades, do 4 egn passé a servir te Fascia, ence suor Beata é stata chiamada utró, la jirà a Roma per na neva enciaria e tel ultim fin de setemana, te le messe de la sera, en sabeda a Poza e en domenia a Pera, l à saludà e rengrazià da comunanza.

L lurier de le monie de la Sacra Familia de Nazareth va inant a Poza e Pera con suor Daniela, che era ruada l an passà, e con le doi neve monie, suor Gabriella e suor Maddalena: a ele ge é stat dat l benvegnù te le zelebrazion e le à jà tacà so servije per la catechesi e te la comunanza.

De più su La Usc stampèda de vender ai 24 de setember.  (lg)