La Usc di Ladins

26 de setember del 1981, 26 de setember del 2021. Anter chesta doi dates l é passà giusć 40 egn e no podea vegnir cernù na dì più adatèda per recordèr n travert emportant. Te la dì che l é ence la giornèda europeèna di lengac, metuda su per recordèr l’emportanza de duc i lengac e per ge dèr l giust valor al plurilinguism e al leam culturèl, l Istitut Cultural Ladin ‘majon di fascegn’ à volù endrezèr n moment dassen particolèr: la vijita teatralisèda ‘Do l vièl del saer – Père Frumenzio vel te dir vèlch’.

Jai 40 egn, con l’inaugurazion ‘de la neva majon’ te tobià a Sèn Jan vegnìa creà ence i spazies per na biblioteca publica, chela che dapò ti egn se à smaorà e la é doventèda semper più rica de libres e de documenc. Del 2014 la ge é stata dedichèda a Père Frumenzio Ghetta de Martin che l é stat fin dal scomenz un di promotores del Istitut.

Per recordèr e ge dèr merit a chest om, gran studious de la storia de Fascia, David Dorich à abù la bela idea de endrezèr n toch de teater olache l frate da Tamion l é doventà l protagonist, la vida per n viac storich e culturèl, anter papieres, saeres, ogec e recorc. L test é stat metù ju da Ilaria Chiocchetti che con sia esperienza de scritora e regista l’à enrescì, vardà fora e sfodegà anter libres, video e conties, mingol descheche fajea Père Frumenzio, e l é vegnù fora coscita n toch de teater fascinous, anter ‘l serio e l faceto’ i dijessa, con referimenc atuèi a nosc esser daldidanché.

Autres spetacoi vegnarà porté dant en domenia ai 3 de otober e se spera amò ence te autra ocajions, magari ence per la scoles.

De più su La Usc stampèda de vender prum de otober.

 (Monica Cigolla)