La Usc di Ladins

Don Enrico Conci, l preve a cef de la parochia de Moena da ben 21 egn, l é ruà a la fin de sie encèria te Fascia. Ades l jirà te la Valsugana desche colaborador pastoral, semper compagnà da la perpetua Gianna, che la ge é stata apede con discrezion e capazità ence ti egn passé a Moena.

En domenia ai 26 de setember da les 3 domesdì l à zelebrà l’ultima messa te la gejia de Sèn Vile, fat ite tel braciacol pien de calor e de afet di moenac, che dassen en gran numer no i à volù mencèr al ultim apuntament con sie preve.

Con fèr segur e n grignot douc e seren sul mus don Enrico à portà inant la funzion compagnà da don Mattia Vanzo e don Devis Bamhakl, i doi joegn preves moenac che l à abù la sodesfazion de sostegnir te sie percors de fe, don Bruno Daprà e don Elio Sommavilla, a la prejenza di gropes de volontariat de paisc, de l’autoritèdes ziviles e militères e n muion de paesegn; l era stat endrezà ence n maxi scherm te Oratorie per dèr l met a chi che no aea troà post te gejia de tor pèrt ampò a la messa.

De più su La Usc stampèda de vender prum de otober.

 (Cristina Marchetti)