Vittorio Sgarbi à aprijià Fascia e sia operes d’èrt

Data

25 de jené 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L president del Mart à domì al hotel ‘Locanda degli artisti’ de Cianacei e l é stat compagnà a veder la galaria TanArt, la cèsa de Comun, la gejies e l Museo Ladin

L president del Mart e cognosciù critich d’èrt Vittorio Sgarbi en domenia ai 23 de jené l é ruà te Fascia. Na vijita a sorpresa n muie particolèra per cognoscer miec la val e si melaures artistics e culturèi. Chiò, en particolèr a Cianacei, l vegnia da picol coi schi. »É recorc de chest paisc – l à dit Sgarbi – ajache ti egn do la populères vegnie al colege Canonici Mattei de Ferrara. L era na scola de educazion rafinèda che endrezèa la setemènes sui schi e gé son vegnù chiò dal 1961 al 1964.«

Vittorio Sgarbi é stat compagnà te val da Franco Panizza, stat senator e assessor provinzièl, l fèsc pèrt del secretariat de la presidenza del Mart e te Fascia ge à dat l benvegnù la senatora Elena Testor, l vize president del Consei regionèl Luca Guglielmi, l diretor de l’Apt Paolo Grigolli, l professor de la Scola Ladina de Fascia Claus Soraperra e Sergio Rossi gran pascionà de èrt, patron del alberch »Locanda degli artisti« a Cianacei.

Proprio te chest hotel, te la cambra dedichèda a Arshile Gorky, Sgarbi à passà la net anter la sabeda e la domenia e chiò l à podù veder e aprijièr duta la operes d’èrt che Sergio Rossi à metù en esposizion ti spazies de la strutura, soraldut te la cambres, dedichèdes ogne una a n artist desferent. Amò apede Rossi ge à fat veder ence la operes che l é fora te la galaria TanArt olache l critich à moscià enteres soraldut per cheles de Simone Turra e Matthias Sieff.

Sgarbi é stat compagnà a veder ence la cèsa de Comun con sia mobilia originèla di prumes egn Trenta del Nefcent del architet Ettore Sottsass senior, la gejies de Sèn Florian, de la Madona de la Neif e del Sacro Cher con la cortina dessegnèda dal architet Pietro Zulian e la operes de Claus Soraperra.

Amò, inant de pontèr demez per Roma olache l tol pèrt chisc dis a la litazions del president de la Republica, l é jit al Museo Ladin olache la presidenta Lara Battisti e la diretora Sabrina Rasom, ensema a l’esperta Daniela Brovadan, ge à moscià e spiegà la operes metudes fora te la sales del Museo. Sgarbi à domanà de sentir rejonèr per ladin e l à aprijià la particolaritèdes del lengaz e de la cultura ladina. L president del Mart l à sotlineà più outes la belezes naturèles de Fascia e l à dit che apenamai che l podarà l vegnarà endodanef.