Dai 14 ai 18 de setember, tel Simposie Toni Gross, artisć, studenc e esperc porta dant l conzet de 'overturism - turism de massa'. L vent nasciù per recordèr l om de èrt, de scola e de crepes se dejouc ti paijes de Poza e Vich per endrez de la Scola de Fascia adun con l'Union di Ladins e l Comun de Sèn Jan.
Anter i prumes projec che pea via te chest scomenz del nef an de scola l é l Simposie de èrt entitolà a Toni Gross (1932-2005), stat professor e preside del Istitut d'èrt, zipiador ma ence alpinist, menacrep e socoridor. Chest event, nasciù del 2012 da la colaborazion anter l'Union di Ladins de Fascia, la Scola Ladina e l Comun de Poza, l é jit inant vigni doi egn e l é ruà a la VII edizion, semper travers la bona colaborazion anter la istituzions e vardan de ge dèr na bona lèrga al ladin.
Chest an l se dejouc dai 14 ai 18 de setembe. Te la fasa de projetazion, peèda via amò l an passà con l sorastant Federico Corradini, l é stat cernù desche argoment per la neva edizion 'Overtourism - turism de massa' olache la traduzion
ladina à l dopie referiment al talian 'di massa' e 'di troppo', e l é stat portà ite ence vèlch auter mudament. L é stat envià la scoles d'èrt olache vegn lurà l legn di raions de mendranza e de la Èlpes à fèr n projet sul tem e l manèr ite con la candidatura de partezipazion. Al Simposie 2026, apede ai studenc e ensegnanc del Liceo Artistich de la Scola Ladina de Fascia coi professores Matthias Sieff, Davide Deflorian e Tiziano Deflorian, tolarà pèrt l Liceo Artistich G. Sello de Udin, i Licees de la èrts de Trent e Rorei Vittoria e Depero, l Liceo Pascoli de Busan e l Lizeum d’ert Cademia de Ortijei con l professor Patrick Senoner. Per duta la setemèna che vegn studenc e dozenc i lurarà fora sia operes te 13 postazions enjignèdes dal Comun tel zenter de Poza e (chesta l é n'autra neva) ence tel zenter de Vich. Apede ic sarà ence doi artisć cognosciui: Sara Andrich da Belun e Giar Lunghi dai Grijons.
En jebia che vegn ai 17 de setember da mesa les nef da sera te sala de Comun de Sèn Jan sarà na meisa torona sul tem '
Overtourism: turism de massa?' con la partezipazion de Matteo Righetto, Michil Costa e Nicolò Weiss e la moderazion de Mirella Florian. En vender ai 18 de setember l event se serarà su da mesa les undesc con la restituzion de la operes te Liceo Artistich.
(LG)
