La Usc di Ladins

Trei temes emportanc à caraterisà l Consei General de mèrtesc ai 10 de mé. N consei belebon curt, ma che con gran sodesfazion ge à dat l via a la gestion unitèra te val de la manutenzion di troes, de la coa di picioi e servije Tagesmutter e de na formazion spezifica per i operadores del turism de val.

L projet per rencurèr e valorisèr i troes peà via l an passà per rencurèr e valorisèr i troes da bosch e da mont l é stat prejentà dal conseier de procura Giorgio Dorich. Nasciù do n lonch percors de confronc e contac l era stat formalisà da la cordanza anter l Comun General, i Comuns e la Frazions, l’APT e la Lies da mont SAT. Do n an de proa – à deschiarì Dorich – chest an l é stat fat n auter bel vèrech inant con na convenzion per 5 egn che ge dèsc stabilità a chest endrez e a chi che se à tout su l empegn. E l projet jirà amò inant con de etres obietives.

La conseiera de procura Mirella Florian à rejonà del servije de la coa per i picioi che verjarà a Soraga chest uton. Florian à sotrissà l’emportanza per l CGF de ge sporjer la medema oportunitèdes a duc e dutes, ence a la mères che laora e zenza desferenzes anter n paisc e l auter. L é stat enjignà e aproà na convenzion con chela che i Comuns ge à dat su al Comun General duta la gestion di servijes educatives per i picoi fantolins che no va amò a la scolina, tant per la coa di picioi che per l Servije de Tagesmutter, che arà per duta la val i medemi priesc e oraries.

L conseier de procura Riccardo Donei – che l Consei à confermà desche raprejentant del Comun General te l’APT – à portà dant na neva scomenzadiva che fèsc pèrt del projet A Majon per sostegnir l’economia de val. Se trata de n cors de formazion con esperc pissà soraldut per i operadores del turism che se spartesc te 3 scontrèdes. La pruma é en program ai 18 de mé e duc é envié a se scriver ite te ofize APT de Poza.

De più su La Usc stampèda de vender ai 13 de mé.
 

 (Lucia Gross)