La Usc di Ladins

Do la radunanza generèla di 22 de oril, olache l president da dant Leonardo Bernard che aea anunzià sia demiscions ge à passà l testamonech te man a Ivo Bernard e a n nef Consei, i componenc del diretif giusta lità i se à binà enstadì per tachèr ite l’atività.

L é stat ratificà la encèries, che veit apede al president Ivo Bernard sie vicarie e vizepresident Alessandro Mobiglia, e amò desche vizepresident Emilio Scanagatta e secretèra con funzion de tesoriera Alessia Daprà. L Consei tol ite amò Cesare Pastore (che ampò chel dì no l à podù esser), Michela Montorfano, Sergio Liberatore, Moreno Rizzi, Renato Bernard e Marco Franco.

L nef Consei se à troà sobito a cogner fèr front a vèlch problem che era vegnù fora te la radunanza, en particolèr per chel che vèrda la gestion di conts, ajache l bilanz segnèa n passif de beleche 60.000 euro, e amò vardèr fora la cordanzes per desvalives projec e scomenzadives olache l Ski Team Fascia à abù te chisc egn n ruol emportant ma l se à troà penalisà a livel economich. En particolèr la gestion di gregn evenc, la scomenzadiva de Istà per i bec te la Val de Sora e la convenzion per l Ski College.

Se trata de empegnes al ben de la comunanza che l Ski Team Fascia vel seghitèr a portèr inant, ampò ge vel che la convenzions e i raporc sie più chières e definii per chel che vèrda l aspet finanzièl, per no risièr che la sociazion do aer lurà la se troe a la fin a cogner ge n jontèr.

De più su La Usc stampèda de vender ai 13 de mé.

 (Lucia Gross)