La Usc di Ladins

Mez secol l é n travert emportant per na atività. L segna la storia e l troi per n paes e per na comunanza entria. Chest an l é belapontin 50 egn de la botega de guanc Ladin Sport de Moena de la familia Deville del Fregolin. Descorion valch de più de la storia de chesta atività.

Marilena Donei del Latanzio e Ivan Deville del Fregolin se à maridà del 1972, de jugn de chel an i à avert ensema la prima botega che l’aeva inom Ladin Sport. La era te via Milano, tedò al Hotel Cavalletto. Te la picola botega l era int dededut: guanc sportives, moda tirolesa, se fajeva laores da sartor e de confezion, e d’invern i tegniva ence bob, strosec e i fitava schi.

»Giö saeve l todesch ajache son stata te colege a Mühlbach – ne conta Marilena – dapò del ’66 son stata n an a Londra a emparar ingleis e me rangiave ence col franzous ajache son stata per n trat te la Franzia vejin a Grenoble. Per fortuna che saeve i lengac, senó no fossa stat possibol laorar con la jent foresta che vegniva a Moena. Enlaoita ruava n mulge de todesć, l mes de firè l era pien, dapò ruava ence jent dal Est, polaches, cechi, ungereisc, svedeisc.

De più su La Usc stampèda de vender ai 22 de messèl.  (Monica Cigolla)