La Usc di Ladins

L’à vent te cèsa, Sabrina Pellegrin, la joena de 22 egn da Moena che en sabeda ai 13 de aost la é stata encoronèda te sie paisc desche neva testimonial de la garejèdes che sot l inom Marcialonga met adum sportives di schi da paslonch, de la roda e de la corsa.

Sarà proprio te chesta ultima disciplina, te la 20^ edizion de la Marcialonga Running Coop en program ai 3 de setember, che Sabrina Pellegrin podarà per la pruma outa spetèr al travert i venjidores per ge meter al col la gherlanda de orèr. Dapò ai 29 de jené 2023 la sarà protagonista de la edizion spezièla nr 50 de la Marcialonga da d’invern, e en ultima de mé del an che vegn de la 15^ Marcialonga Cycling.

Cedean toron per la trei competizions, e ence per la fegura de la Soreghina, che vegn litèda dal 2002 e che te duc chisc egn la é stata prejentèda desche na tousa che cogn esser sportiva, ativa tel sozièl, leèda a sia tera de la valèdes de la Veisc e pratega te la doura di lengac. Ben segur n bel grignot, na fegura solara e positiva l é carateristiches aprijièdes, ma no l é mai stata tel spirit de chesta fegura chierir na beleza da »miss«.

Per chest cedean l é stat fat na ecezion e Soreghina é stata litèda tel chèder del concors de Miss Eleganza per la rassegna de Miss Italia endrezèda da Sonia Leonardi. Apontin ansera, pech dant mesanet, al luster del colm de luna, Sabrina Pellegrin é stata cernuda desche Soreghina anter 11 touses candidèdes per Miss Eleganza, fascia chesta ultima che é jita a Giulia Barberini. Sabrina se à dapò confermà al top ence anter 22 »miss« de concezion classica, ruan endò sul podie, al terzo post de Miss Eleganza.

Sabrina Pellegrin la é de naa da Soraga ma enciasèda da egn a Moena e la se à prejentà saludan duta la jent che se aea binà te Piaz de Sotegrava con n bel »Bonasera a duc e n develpai de cher de esser chigiò«, desmostran de esser paruscenta e ladina sćiantiva.

L’à dit de esser n muie contenta de esser la neva Soreghina, de esser na tousa determinèda e che sie mot l é »ad maiora semper«. Tel sport l’à amirazion per la campiona de schi americhèna Lindsey Vonn, la é stata trop a la foresta e, apede al  talian e al ladin, la rejona, ingleis, todesch e mingol ence finlandeis. Dut chest à fat spervaja la giuria, con a cef l president de la Marcialonga Angelo Corradini, che Sabrina l’à duta la carateristiches per esser la neva Soreghina ideèla e Corradini ge à matù la fascia che tel ultim an era stata de Silvia Zorzi. Apede a chest onor, desche semper a la neva Soreghina ge é stat sport l don de la Magnifica Comunità de Fiem dal Scarie Renzo Daprà e l assegn de ITAS consegnà da Christian Rossi. No l é mencià n bel maz de fiores e n braciacol da man de Cristian Zorzi e l gran batiman del publich, soraldut da si paesegn e da amisc e peconc de Fascia.



 (lg)