La Usc di Ladins

La rejons de la mort de Albino Luciani, troà zenza vita ai 28 de setember del 1978 da doman, do demò 33 dis de pontificat (l era stat proclamà Papa ai 26 de aost), no les é mai states deschiarides del dut, ma chel che é segur l é che demò te chel meis l Papa ruà da la Dolomites l é stat bon de lascèr l segn.

Nasciù del 1912 a Canal d’Ègort, Jan Paul I no l era proprio ladin (per schivèr strumentalisazions), ma ampò n muie vejin a Fascia e soraldut a Moena, ajache demò l jouf de Sèn Pelegrin e n auter pugn de chilometres spartesc noscia val da sie paisc, sot Falciade. L à portà chi valores de la jent da mont che sention tant nesc, ma l à palesà ence posizions deldut neves te la Gejia de chi egn, pienes de umanità per la persones e ence revoluzionaries, envers i lurieranc, la femenes e adertura la contracezion.

La cauja di canonisazione de Jan Paul I é tachèda ite del 2003, do 25 egn che Luciani era mort e ai 9 de otober del 2017 da Papa Francesch à sotescrit l decret su la vertudes.

En domenia ai 4 de setember a Roma Papa Luciani vegn proclamà Beat. La zelebrazions pea via doman, sabeda ai 3 de setembe da les 18:30 te la Basilica de S. Giovanni in Laterano, olache la vea sarà vidèda dal vicarie general de Papa Francesch per la Diozesa de Roma, l cardinal Angelo De Donatis. L dì do sarà la sènta messa de beatificazion da les 10:30 en Sèn Piere, con Papa Francesch e col vescof de Belun mons. Marangoni, l postulator card. Stella e la vizepostulatora Falasca.

en domenia ai 11 de setember da les 4 domesdì sarà dapò la messa de rengraziament per la beatificazion a Canal d’Ègort, presieduda dal patriarca de Unejia Franesco Moraglia.  (Lucia Gross)