La Usc di Ladins

Da temp se sà che la Provinzia de Trent, per se emprevaler di scioldi a la leta per la Olimpiades Milan-Cortina 2026, à cernù de portèr inant te la valèdes de la Veisc l projet BRT, Bus Rapid Transit, per chierir de miorèr e fèr più asvelt l coleament publich anter Fiem, olache sarà la garejèdes, e Fascia, olache cognessa troèr alberch compagnadores e publich per arsegurèr i numeres domané per l azet de chest gran event.

N projet che vel soraldut ‘fèr passèr dant’ l trasport publich sun goma, che vegnissa miorà ence con corieres neves più ecologiches. Ti desvalives paijes l é pervedù de endrezèr miec la fermèdes, a na vida che i mesi publics posse se fermèr daperdut fora de strèda, e chesta fossa segur na bona idea. Apede chest l é la previjion de meter ju na lingia de semaferes per ge dèr la prezedenza a chisc mesi respet al trafich privat e en ultima, e chest l é fosc l pont maormenter contestà, de slarièr olache l é meso l stradon fajan neva corsies dedichèdes a la corieres e ai mesi de socors.

L Document Preliminèr de Projetazion (DPP) lurà fora dai tecnics per la Provinzia vegn prejentà anché jebia ai 8 de setember te na scontrèda publica da les 17:30 te Sorastanza de la scoles a Sèn Jan. Endèna aboncont i aministradores di Comuns de Fascia i aea jà abù l met de veder la proponetes e i à portà dant travers l Comun General de Fascia duta sia osservazions, olache no mencia posizions critiches.

Podede les lejer su La Usc stampèda de vender ai 9 de setember.  (Lucia Gross)