La Usc di Ladins

Con l’esposizion de na gran veta de color resa, metuda fora dedant a sia senta a Sèn Jan, ence l Comun General de Fascia vel ge recordèr a duta la sentadines che otober l é l meis de la prevenzion del tumor al piet. La Conseiera de procura Mirella Florian e i servijes sozièi vel uzèr l’atenzion e sensibilisèr sun chest tem, che vegn simbolisà apontin con na veta resa.

»La scomenzadiva de la LILT “Campagna nastro rosa” – disc la conseiera Florian – dèsc l met de fèr na scontrèda individuèla per emparèr a se controlèr enstesc e la vijita de control debant. Envie duta la eles a tor pèrt ajache se trata de na azion de prevenzion de gran emportanza: con mingol de atenzion a tor sù la indicazions de la Azienda Sanitèra se pel smendrèr de n muie l pericol per la femenes de svilupèr n tumor al piet o de se n adèr demò canche l é massa tèrt per poder meter en doura tratamenc manco pesoches. Per informazions e per tor apuntament ge vel chiamèr ite l numer 334 2588505, de vender da les 9:30 a les 11:30 o  lunesc da les 14:30 a les 16:30.«  (LG)