La Usc di Ladins

En mèrtesc ai 25 de otober la sociazion sportiva Monti Pallidi de Moena à tegnù la radunanza di sozi olache, apede al bilanz e a la relazions su l’atività del president Carlo Ganz, n moment emportant l é stat la premiazion di bec che aea tout pèrt al bando per ge dèr n stipendium »scola e sport« per i bec e joegn de duta la categories.

Dantfora l president à prejentà l rendicont de l’atività portèda inant dal meis de messèl 2021 ai 30 de jugn del 2022: n an rich de sodesfazions, che à vedù crescer sia atività, con n smaorament del 57% per l bilanz che l é passà da 209.000 a 330.000 euro. L é cresciù ence l numer di sozi, che da 262 i é rué a 341, donca l 30% più che l an dant, passan via ence i numeres che l era dant dal Covid.

N muie l é stat i obietives porté a compiment te chest an dal diretif vidà da Ganz, che ge à sport n gran develpai ence a l’aministrazion de Comun, en particolèr al assessor al sport Felice Canclini, ai desvalives enc e sponsor che dèsc sie sostegn e se sà ben a duc i volontadives che deida.

»Te chest an aon vardà de ge jir encontra a le familie e de tegnir l cost per se scriver int a la sociazion semper medemo per dute le discipline – à dit l president – l é stat arsegurà l bon endrez de alenamenc e trasferte e de le gare che ge é stat dat su a la sociazion e l é stat portà inant l ritiro de la Fiorentina, ensema con l’APT de Fascia e l Comun de Moena, con empegn e co la competenza e esperienza che vegn da 10 egn de gestion de chest event. Apede chest la sozietà à vardà de arsegurar la prejenza per l secretariat e l’aministrazion ordenara e l’à miorà la desponibilità per i trasporc compran n nef pulmin col didament de la Provinzia.«

L president con dut l diretif à pissà de envièr via na bela scomenzadiva per engaissèr i joegn sportives de la sozietà che porta inant con bon ejit ence si studies. Endèna la radunanza l é stat l’ocajion per premièr chi che à arjont la valutazions miores anter scola e sport ti setores del schi alpin, paslonch e combinazion nordica.

De più su La Usc stampèda de vender ai 4 de n ovember.  (Lucia Gross)