La Usc di Ladins

ognosciù soraldut desche campion de schi e dapò tecnich de la nazionèla, Helmut Schmalzl da Gherdena ades l à mudà paisc e atività, ma l à tegnù n leam strent con noscia valèdes ladines. Te Fascia l é restà semper en contat con Ivo Bernard, ence el empegnà tel setor sportif e ades ombolt de Ciampedel. N fil che se à ciolà ite amò più strent ti ultimes egn. Schmalzl defat, do aer lascià l mond sportif agonistich ades l stèsc tel Friul e al Castello di Aviano l à sie laboratorie olache l zipia. Jai doi egn l à realisà n gran Crist che l ge à dat en don a Piancavallo é l é stat logà sul mont Tremol. Per l schiador e artist de Gherdena la prejenza de chisc simboi religiousc su per i crepes l é segn de memoria, respet e speranza.

De jené del 2021 à soscedà gran dolor a Ciampedel, te duta Fascia e ence fora da nesc confins, la burta neva de la mort sot na levina del joen menacrep e maester de schi de 27 egn Etienne Bernard, fi de Renato e nez de Ivo, e te chel grief moment Schmalzl à pissà de realisèr en sia memoria n Crist amò più gran. Chesta fegura de 2 metres e 60, semper zipièda tel legn de tei desche chela de Piancavallo, é stata metuda su na crousc auta 5 metres e mez. En Sènta Maria Maor, a la festa de la Jent da Mont, chest Crist fajea bela parbuda te Piaz de Ciampedel, olache a la fin de la zelebrazion l é stat benedì dal piscop de Trent  Lauro Tisi. 
Enstadì l gran Crist l é stat logà te sie post, sora Ciampedel, avisa sot ite Ponjin.

De più su La Usc stampèda de vender ai 4 de november.  (Lucia Gross)