Ensema per nesc fies

Data

22 de november 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L Comun General de Fascia ensema ai genitores porta dant n projet de sostegn anter families con joegn che à dependenza da alcol o droghes.



L argoment l é delicat, ma no se pel fèr mena de no l veder. L é vegnù fora bel chièr tel cors de la scontrèdes che l Comun General de Fascia, con la conseiera de procura Mirella Florian e l Servije Sozio-assistenzièl, à metù a jir chisc meisc passé tel chèder del percors Anteveder, per enrescir e studièr i besegnes de la comunanza per dapò troèr fora e sporjer responetes concretes e inovatives ai problemes, ence col meter en esser rees del teritorie e cordanzes istituzionèles.

La scontrèdes à palesà l problem te val de la doura de alcol e droghesda pèrt de joegn e joenes ma ence de jent grana, che per desvaliva persones pel doventèr dassen na dependenza, con ejic zis grieves su la sanità de la persona, de la familia e de duta la comunanza.
Aldò de chest l é stat fat n prum vèrech per meter a jir na rei de sostegn, che à jà troà la desponibilità de doi genitores.
»Se trata de n fenomen amò n muie sconet – disc la conseiera de procura Mirella Florian – e l é senestrer l veder e troèr respostes: ge vel che apede a la istituzions sie la colaborazion de duta la comunanza, dantdaldut de la families che pel se troèr te chesta situazion. La pèrt che pel fèr la familia la é defat fondamentèla ajache l é l prum lech di afec olache se empèra co se meter en relazion coi etres e co rejer la emozions. Vèlch père e mère à contatà l Servije sozio-assistenzièl e i se à perferì per didèr a meter en pe na rei de genitores che posse doventèr ensema n didament atif per duta la families che vif te na situazion ria a cajon de la doura de sostanzes da man de na persona de cèsa, per ge fèr front ensema a la fadies e ai padimenc che pel entravegnir.«

L Servije sozio-assistenzièl del Comun General de Fascia, donca, porta dant, dessema coi genitores Bruno Antonioni e Monika Leitner, la Rei “Ensema per nesc fies”; tor pèrt a chesta Rei del teritorie dajarà l met de recognoscer e ge fèr front a chesta costion, meter adum esperienzes e strategies che à garatà o podessa garatèr dedant da n comportament da spes senester da entener e rejer.
La rei se tolarà su l’encèria de envièr via scomenzadives de sensibilisazion de la comunanza, ajache la doura de alcol e droghes la pel tocèr duta la fasces de la popolazion e donca la ne revèrda duc. 

De più su La Usc stampèda de vender ai 18 de november.






 (LG)

Galaria retrac