La Usc di Ladins

Enveze che endrezèr prejentazions de libres fora per l istà, canche i desvalives Comitac e sociazions sporc jà n program belebon rich, preferesce sporjer ocajions culturèles fora de sajon, per i fascegn. Chest, presciapech, l ne aea dit al scomenz de chest an Daniele Verra tel tor su sia neva encèria de responsabol de la Biblioteca de Cianacei.

Fora per l an scontrèdes per i fascegn picoi e gregn, te Cèsa de Comun o a l’averta, Daniele Verra l n à endrezà desvalives, se conferman tel ruol emportant de operator cultural de sia comunanza.

L’ultima scomenzadiva à per titol »Se cognoscione?« e l é na lingia de cater scontrèdes che met dant persones e fac de noscia tera. 

Te la pruma, stata ai 10 de november, la atleta paralimpica da Vich Chiara Mazzel à prejentà sie liber »La sfortuna, una fortuna«, didèda da la domanes de Gaia Mortola Bernard, dedant a passa 20 persones, n bon numer che Verra no l se aessa nience spetà. Amò maora l é stat donca la marevea del organisador canche l mercol do, ai 16, l à vedù la sala del Consei de Comun de Cianacei se empienir con passa 30 fascegn, rué da duta la val a scutèr l apuntament dal titol »Gran Vera e pera jent«. 
Con la capazità de soscedèr enteres che ge vegn da sia esperienza de ensegnant, l professor e storich Cesare Bernard à compagnà l publich a cognoscer i aspec più vejins de la Gran Vera, no chi che se lec sui libres de la storia grana, ma chi che podon cognoscer travers i eies, la paroles, i retrac e i scric de noscia jent.

L ultim apuntament metù dant da la Biblioteca de Cianacei te la rassegna »Se cognoscione?« l é anché, mercol ai 30 de november da les 18:00 te sala del Consei de Comun de Cianacei e l é dedicà ai »Fascegn a la foresta«.

De più su La Usc stampèda de vender ai 25 de november.  (Lucia Gross)