La Usc di Ladins

En vender ai 27 de jené l é stat chiamà ite l Consei de Comun de Ciampedel. Al prum pont del orden del dì l era la varianta Ciampedel-Cianacei, i conseieres é stac chiamé a dezider coluna soluzion aproèr per l paisc. 

Dantfora l’ombolt Ivo Bernard e l assessor ai lurieres publics Alessandro Bernard à spiegà i vèresc prinzipèi che à portà l’aministrazions de Ciampedel e Cianacei a se confrontèr con la Provinzia de Trent.

Al scomenz del 2021 se rejonèa de autra doi soluzions de varianta che purampò no ge jia ben ne a Cianacei e nience a Ciampedel ajache la strèda aessa sbregà ite Soreghes e Ischia e passà fora per l Ciuch. L é stat de gra ai ombolc che à seghità a domanèr n confront che la Jonta de Trent é ruèda a chesta ultima soluzion che perveit na galaria unica che passa fora duc doi i paijes de la val de Sora. Chest nef projet é jà stat aproà dal Consei de Cianacei a la fin de dezember e ades l é stat tout su ence dal Consei de Ciampedel. Ma no dut entriech. Do la discuscion averta anter i conseieres l é stat dezidù de renunzièr a la ‘bretella’ lo da la villa Ruggero che aessa cognù coleèr l stradon con l piaz de la forenadoa ma che fossa stat n dopion. Amò apede ge vegn domanà a la Provinzia de Trent de smendrèr più che l é meso l impat del prum toch de viadot da la rodadoa de Col de Lin e che l pont sora la Veisc vegne fat più bas che l é meso. 

L projet per la circonvalazion é stat aproà da 7 conseieres, doi se à astegnù: Maurizio Valentini de la maoranza e Manuel Capovilla de la mendranza.


De più su La Usc de en vender ai 3 de firé del 2023  (Monica Cigolla)