Shiffrin, Goggia e la sores Delago se arcedea te Fascia

Data

02 de fauré 2023

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Su La Volata e sun Aloch l é la campiones de schi che se enjigna per i Mondièi de Courchevel.

Fascia se desmostra semper de più l lech recognosciù per i atlec e la atletes mondièles de schi tant per i alenamenc che per la ospitalità. Chisc dis l é la eles che se arcedea sui portoes de La Volata sun Sèn Pelegrin e sun Aloch a Poza per se enjignèr per i Mondièi de Courchevel e Meribel che sarà dai 6 ai 19 de firé.

Na gran fola de sostegnidores à sapù che fossa ruà la campiones Mikaela Shiffrin e Sofia Goggia e i é jic sun Sèn Pelegrin per les veder endèna i arcedamenc. Angern, mercol al prum de firé, da doman bonora prest su La Volata, dant l é stat la proes asveltes de la norvegeises Mowinckel e Kajsa Vickhoff Lie, de la americhènes Breezy Johnson e Isabella Wright e de la ladines da Gherdena Nadia e Nicol Delago. Dapò l é stat metù ju danef l percors dal staff tecnich talian con Gianluca Rulfi e Giovanni Feltrin per i arcedamenc de Super G de la trei reines Sofia Goggia, Alice Robinson e Mikaela Shiffrin, cheles che sarà segur la protagonistes te sia disciplines ai Mondièi.

Sofia Goggia la é sutèda jabas endèna l arcedament ma per fortuna zenza conseguenzes. Mikaela Shiffrin, che à l record de ventes te Copa del Mond, l à dit che la vèrda con fiduzia ai Mondièi franzousc olache la proarà a ciapèr una o doi medaes.

Anché, jebia ai 2 de firé, va inant i arcedamenc sui portoes de Fascia, metui a la leta de gra a la cordanza ‘Piste Azzurre’ con l’Apt de Fascia, con la atletes de la disciplines asveltes su La Volata e l’autres che se arcedarà tel slalom sun Aloch.  

 (MCI)