La Usc di Ladins

Poder festejar na persona per l bel travert di 100 egn l é segur n onor per chi de ciasa e per la comunanza entria. Ai 16 de marz compesc 100 egn Giuseppe Dellantonio, Bepi Tasin, da Moena. Da egn l é enciasà a Trent ma ogne istà l vegn deretorn te sie paisc de naa olache l à soa majon ite per Longiarif.

100 egn, no duc à la grazia de ruar a chesta bela età e amò en sanità ence col ciaf. Bepi Tasin l é amò pien de curiosità. Te chisc egn l é semper stat n muie vejin a soa comunanza, enceben che l aesse passà gran part de soa vita fora de Fascia, dant a Ciastel Tesin e do a Trent. L lec con gust La Usc di Ladins e l boletin Nosha Jent, l scouta Radio Studio Record, l se enteressa di ladins, de l’Union e del Grop Ladin da Moena con chel estro de cognoscer e de saer che l à abù te duta soa longia vita.
Bepi Tasin l é l più veie menacrep de Fascia e ogne an l tol part a Ciampedel a la Festa di Omegn da Mont.
L é na persona umola, chieta e savia, n carater che lo à fat aprijiar da le persone che lo à cognosciù e che ge vel ben.
Ge sporjon i più bie augures, ence da man de l’Union di Ladins e de la redazion de La Usc de Fascia.

De più su La Usc stampèda de vender ai 17 de mèrz.