La Usc di Ladins

En domenia ai 26 de marz a Sèn Jan don Erminio Vanzetta l vegn festejà da la comunanza de dute 5 le parochie de la Val de sot. Chesta data la é stata cernuda percheche la é proprio te mez a doi bele ocajion de cedean: i 65 egn da preve e i 90 egn de età. 

Defat don Erminio l é nasciù forin Juan ai 29 de marz del 1933 e l é stat ordenà preve a Trent ai 22 de marz del 1958. Dal 1962 al 1967 l é stat coadiutor a Sèn Jan e do aer ret le parochie de Bondon e Baitoni l é stat per n muie de egn via per l Primier. Del 2004 l é ruà endò a Sèn Jan e l à ret la parochia de Vich, e dapò ence chela de Soraga, fin del 2014, canche l é ruà don Andrea e el l é restà, e l é amò anchecondì, so colaborador.

»L é n gran ejempie de dedizion e de empegn cristian, n prezious aiut per noscia comunanza e per me en pruma persona« à dit don Andrea en domenia passada tel avisar che, percheche duc posse tor part, ai 26 la messa grana de la domenia sarà demò a Sèn Jan: don Erminio ofiziarà la messa grana da le 10 te la Pieif desche prum zelebrant e dapò se podarà ge far mingol de festa sun sagrà.
A chest cedean l é stat leà ence n triduo de orazion per le vocazion: anché jebia te gejia de Sèn Nicolò a Poza l é l'adorazion fin mese le 6 e da le 6 messa con meditazion te calonia de Soraga. Doman vender da le 6 da sera messa con meditazion te gejia de Sèn Nicolò a Poza e en sabeda da le 8 da sera te la Pieif.

De più su la fegura de Don Erminio su La Usc stampèda de vender ai 24 de mèrz.  (Lucia Gross)