La Usc di Ladins

Instadì l Grop de la Mèscres de Dèlba e Penìa à lità sie nef President. L’incèria de rejer l grop, che dal 1979 la é stata prest semper te la mans de Ezio Verra de Pilon, la é passèda a sie nez Marco Verra, che l se à metù a la leta. Apede a el, tel nef diretif l é stat lità dai sozi Cesare Sottsass desche vizepresident, Andrea Eccel, Damiano Casagranda, Federico Merli e Igor Dantone desche canzelist. Ezio Verra l é stat nominà inveze President onorarie de la sociazion che da egn se cruzia de tegnir su l Carnascèr fascian de Dèlba e Penìa.

Aon descoret con ic doi, Ezio e Marco, in cont de chest passaje de testamonech, tolan ca ence recorc e prospetives per l Grop e l Carnascèr.

Can él che siede rué tel grop de la Mèscres?

Ezio: Gé dighe che sarà stat del ’72, ’73. Me saea bel ’sta mèscres e fèr mascherèda e son sutà ite: é fat sobito comedia. É ben fat ence l Bufon e l Marascon. Da Marascon, del 2000 sion jic fora a Hannover al radun mondial de la mèscres. Siane fora de n muie: cater Marascons, gé e mie fra Giulio me recorde, Laché, Bufon, la veia col ceston… trei ores de defilèda!

Marco: Gé inveze é scomenzà intorn l ’95: aee cinch o sie egn e fajee l Bufon. Vedee chi più gregn che i lo fajea e é ciapà gaissa; l é fat per 20 egn, fin canche é podù. Do é scomenzà a fèr mascherèda.

Podede lejer duta l'intervista su La Usc stampèda de vender ai 14 de messèl.  (Nicoletta Riz)