La Usc di Ladins

Ence te Fascia l tormen en mèrtesc ai 18 de messèl domesdì l à fat gran dan empegnan i studafech e etres corpes de protezion zivila da Pian de Schiavaneis enscin ja Moena.

L Ispetor di Studafech del Distret de Fascia Alessandro Pellegrin ne à dit che la chiamèdes à scomenzà a ruèr do les 5 via da Cianacei per jir envers l Sela, ajache da Pian de Frataces su l era n muie de piantes rebaltèdes. L alarm é ruà dapò da Mont de Vich, olache parea che n auto sie restà sot la piantes crodèdes te strèda, ma per grazia l era demò blocà anter la piantes e no sot ite. I Studafech era jic su con la pinzes idrauliches e i à podù didèr a librèr la strèda con la squadra arcedèda per i intervenc con la sia a motor su la piantes en situazions malsegures. L tormen à ciapà ite ence la vila de Tamion, fajan sutèr ju n bon pec de èlbres vejin a la gejia.

Piantes é vegnudes ju ence ence te la Mont de Poza, soraldut ite per i Monciogn, e l alarm é ruà dapò da Soraga, olache parea che sie sgolà demez n cuert, enveze l cuert, anzi adertura trei, i é sgolé demez a Moena. Chiò, conscidran che i Studafech de Moena, con a cef Christian Felicetti, i fèsc pèrt del Distret de Fiem, la squadres de Fascia se à jontà ite a didèr l corp vejin. Moena l é stat l paisc che à abù l dan maor: no demò ai cuerc, ma ence al zenter sportif Benatti olache te chisc dis l é la squadra del Genoa per si arcedamenc, e amò èlbres é crodé tel piaz di auti de Navalge e enlongia Strada de Longiarif, olache l é stat auti danejé ence debel.

N gran lurier, no demò per i Studafech ma ence per l Servije Strèdes, i Polins e i etres corpes de protezion zivila, l é stat su la strèda anter Moena e l jouf de Sèn Pelegrin. Dai Ronc en ite l é vegnù ju dededut e n èlber é ruà ence sui fii de auta tenjion a 130.000 volt. Sul jouf l era presciapech 300 persones che à cognù vegnir portèdes ju te paisc e l é entervegnù la squadra de Poza con la neva autoscèla, chela de Ciampedel con l’autogru e la “torre faro”. Per poder lurèr en condizions de segureza, vedù i pericoi de l’auta tenjion, se à cognù spetèr l intervent de la Terna e demò entorn mesanet se à podù endò orir la strèda, ma l lurier di boschieres con la Forestale va inant amò ades ence sul troi per la rodes anter Poza e Soraga, sui Gran Pians de Vich, che l é amò serà. Daperdut sarà amò da lurèr per meter dut en segureza.  (Lucia Gross)