La Usc di Ladins

N bel projet é stat portà a zil dal Comun de Sèn Jan. L à inom »Storie di una Comunità: ordinamento e valorizzazione degli archivi storici degli ex comuni di Vigo di Fassa, Pozza di Fassa e Pera di Fassa«, l é nasciù su idea del president del Consei del Comun Cesare Bernard e l é stat fat col contribut de la Fondazion CARITRO de la Cassa de Sparagn de Trent e Rorei e la supervijion de la Soraintendenza per i bens culturai del Trentin.

Dal professor Cesare Bernard, enciarià da la Jonta del Comun desche referent del projet e coordenador de la divulgazion, se aon fat contar de che che se trata.

»L era n lurier che menciaa – ne à dit Bernard. Gio ti ultimes 20 egn é fat desvalive enrescide tel archivie storich de Poza e l era dalbon senester, no se saea olà cerir le robe percheche no le era inventariade. L archivie l era ben en orden, metù via bel dalvers, ma no se saea che che l era ite e olache l era. Saee che la Fondazion Caritro metea fora ogne an n bando per intervenc de chesta sort e é pissà che assane podù se n emprevaler.«

Chest lurier – à dit amò Bernard – l à doi obietives, l prum apontin chel de la inventariazion, de sistemar i papieres per ge dar l met a la jent che va a cerir valch de saer olà cerir, l secondo de meter ensema duc i archivies storics del tegnir del Comun de Sèn Jan, chi de Poza e Pera che i era a Poza e ence chi de Vich che i era te Comun de Vich, per far n auter varech de union de la comunanza.

De più su La Usc stampèda de vender ai 8 de setember.  (Lucia Gross)