La Usc di Ladins

I pearà via ai 16 de otober e per poder tor pèrt ge vel se scriver ite dant dai 14 de setember. L é donca amò dassen pech temp per poder se emprevaler de na oportunità preziousa sporta da l’Azienda Provinzièla Sozio Sanitèra del Trentin.

Preziousa per chi che vel se enjignèr n lurier segur e che dèsc de gran sodesfazion, chel del Operator Sozio Sanitèr, ma autertant preziousa ence per duta la comunanza, che de chesta sort de fegures profescionèles l’à semper maor besegn.

A uzèr fora l apel a tor su chesta ocajion l é stat la responsabola di Servijes sozio assistenzièi del Comun General de Fascia Paola Rasom e la caposala de la infermieres Lucia Dellagiacoma. 

Chest cors de solit l aea regnèda 2 egn – les ne à dit – ades enveze l percors é stat scurtà e l vegn sturtà su te 15 meisc. L vegn metù a jir denef te noscia valèdes, avisa fora Juan, te la senta del Comun, e pel se scriver ite fin a 25 persones, ma se no vegn arjont n numer de adejion de amancol 7 o 8 persones no l pea via.

L percors formatif sporc de gran prospetives de lurier: te RSA, te zentres de assistenza via per l dì, te ospedèi, te l’assistenza a cèsa, te copratives sozièles e ti servijes sozio assistenzièi del teritorie.

Chela de Operator:a Sozio Sanitèr:a l é na fegura profescionèla che deida la persona e la familia te la ativitèdes de duc i dis e la dèsc sie didament ence a chi che laora te la sanità, desche medizi, infermieres e tecnics sanitères, la OSS colaborea con desvaliva fegures profescionèles sozièles e sanitères e la se relazionea a na vida profescionèla con la persona e la familia.

Podede lejer dut su la Usc stampèda de vender ai 8 de setember.

 (Lucia Gross)