La Usc di Ladins

Maria Bonelli la vegn da Ciavaleis, ma oramai se pel la conscidrèr sentadina de Sèn Jan, ajache da ben 15 egn la stèsc te la Cèsa de Paussa de Fascia, olache l’à dit che la se troa proprio ben. Apontin chiò, en sabeda ai 2 de setember, l’à festejà l travert toron de 100 egn. 

La presidenta Barbara Bravi, la diretora Elisa Emiliani, la animatora Serena Pederiva e la operatores de l’APSP ge à enjignà na bela festa. L piaz dedant l é stat fornì con balogn da color e n bel desch sot la scrita »100« olache Maria bela fornida e emozionèda l’à podù se sentèr ju te mez anter i fiores, desche na reina. 

Sot n bon soreie ciaut i utenc se à binà per ge fèr i augures, con la ciantia, l batiman, la rima e ben segur ence na bela e bona gran torta, che Maria à taà e che dapò duc à podù cercèr con gust.

Maria Bonelli te sia vita l’à lurà te la cèsa da fech del ospedèl de Ciavaleis. A Sèn Jan a la festejèr l é vegnù n grop de parenc e peconc e per l’ocajion l é ruà ite ence l ombolt de Ciavaleis Sergio Finato e l’assessora al sozièl Carla Vargiu, che i ge à fat i complimenc a chesta sentadina de 100 egn e i ge à sport na bela orchidea.

L Ombolt e l’Assessora de Ciavaleis i é resté maraveé da la bela posizion e dai spazies de la strutura lumenousa de la Cèsa de Paussa de Fascia, che i à podù vijitèr con la Presidenta e la Diretora, e i ge à sport dantfora i augures de bon cedean ence a l’APSP, che festejarà i 20 egn de vita en domenia ai 17 de setember. 

De più su La Usc stampèda de vender ai 8 de setember.  (Lucia Gross)