La Usc di Ladins

»La Mont é femena, la Mont é forza, l é solidarietà, l é gaissa de spartir con duc la pascion de le ele. Per chest aon volù cerner chest tem per noscia neva mostra de èrt.« L é stat la paroles de Ilaria Chiocchetti del Pelin tel inaugurèr la mostra coletiva de la artistes del grop ArtèDonna de la sociazion »La Voce delle Donne« dedichèda belapontin a la mont. 

»Te chisc egn aon endrezà n mulge de mostre via per l istà – à dit Chiocchetti – l é semper stat mostre che no aea n tem definì, ogne artista podea meter fora n’opera che ge piajea de più. Chest’outa enveze se aon empensà de ge dar n titol e coscita l é vegnù fora la Mont.«

Te la bela sala espositiva a pe pian de ciasa de Comun de Moena, dedichèda a un di maores artisć de noscia val, Valentino Rovisi, l é stat metù fora la operes de diesc artistes de Fascia e Fiem. Diesc artistes che à portà sia vijion desferenta de la Mont: na mont lech de pèsc, de natura, de mudament, de mescedament, de colores. Na mont da respetèr ma che semper respetèda no la é, na mont da amèr ence coi fac no demò con la paroles, na mont da descorir te ogne più picol particolèr. 

De più su La Usc stampèda de vender ai 8 de setember.  (Monica Cigolla)