La Usc di Ladins

Ades che co la publicazion de la letres fascènes de Amadio Calligari da Larcioné sion rué a piz, podon jir inant ence con noscia rubrica e trèr fora da chi scric dotrei curiositèdes per entener miec l valor de nosc patrimonie linguistich e culturèl. En cont de chest sion ben jà fortuné de aer a la leta vocabolères ‘storics’ de gran emportanza, desche l Ladinisches Wörterbuch de Hugo de Rossi (ms. 1914), l dizionèr de don Mazzel (1976) e chel del Bepi Moghen (1972), che en cont de lessich e morfologia ne dèsc na bona descrizion de duta trei la variantes del ladin fascian. Alincontra aon jà vedù che vèlch outa per deschiarir conzec e definizions, o adertura per comedèr loces e strantenimenc, no l’é nia de miec che jir a chierir coche chela paroles vegn durèdes ti tesć che ne à lascià i ‘scritores ladins’ dant da nos. Con chest zil é stat pissà l projet Vocabolèr del ladin fascian (VoLF), metù a jir da l’Istitut Cultural Ladin, che del 2020 à dat fora n prum codejel pre-print co la letres ABC.

Podede lejer dut su La Usc stampèda de vender ai 8 de setember.  (Fabio Chiocchetti)